ས་སྐྱ་ལེགས་བཤད

འབྱུང་གནས།: རྩོམ་པ་པོ།:ཀུན་དགའ་རྒྱལ་མཚན དུས་ཚོད།:2008-11-24 Tag:བསླབ་བྱ་གསུམ་ཚན   བཀོད་པ།:
༄༅།།ས྄་སྐྱ་ལེགས་བཤད།
༄༅།།རྒྱ་གར་སྐད་དུ།སུ་བྷ་ཥ་ཏ་རཏྣ་ནི་དྷེ་ནཱ་མ་ཤཱ༔
བོད་སྐད་དུ།ལེགས་པར་བཤད་པ་རིན་པོ་ཆེའི་གཏེར་ཞེས་བྱ་བའི་བསྟན་བཅོས།

ལྷ་ཡི་མཆོག་དང་ཀླུ་དབང་གྲུབ་པ་རིག་འཛིན་གཙོ།
དྲང་སྲོང་རྒྱས་པ་གྲོག་མཁར་བ་དང་རྐང་མིག་སོགས།
ཀུན་ནས་དགའ་བའི་གཙུག་གི་ནོར་བུས་ཞབས་མཆོད་པ།
འགྲོ་བའི་གཙོ་བོ་ཀུན་མཁྱེན་དེ་ལ་བདག་ཕྱག་འཚལ།

རིག་པས་དཔྱད་ན་ཆོས་ལུགས་མི་འགལ་ཞིང༌།
འཇིག་རྟེན་བྱ་བ་ཀུན་ནས་ལེགས་བསྒྲུབ་པ།
དམ་པ་རྣམས་ཀྱི་སྤྱོད་ཚུལ་ཅི་འདྲ་ཞིག
བཤད་པ་འདི་ནི་ལེགས་བཤད་རིན་ཆེན་གཏེར།

མཁས་པ་ཡོན་ཏན་མཛོད་འཛིན་པ།
དེ་དག་ལེགས་བཤད་རིན་ཆེན་སྡུད།
རྒྱ་མཚོ་ཆེན་པོ་ཆུ་བོའི་གཏེར།
ཡིན་ཕྱིར་ཆུ་བོ་ཐམས་ཅད་འབབ།

སྐྱེ་བོ་ཡོན་ཏན་ཡོད་མེད་པའི།
བླང་དོར་བློ་གྲོས་ལྡན་པ་མཁས།
རྡུལ་དང་འདྲེས་པའི་ལྕགས་ཕྱེ་རྣམས།
ཁབ་ལེན་རྡོ་ཡིས་ལེན་པར་ཤེས།

ལེགས་བཤད་མཁས་པའི་བློ་གྲོས་ཀྱིས།
གོ་ཡི་བླུན་པོས་དེ་ལྟ་མིན།
ཉི་མའི་འོད་ཟེར་ཤར་བ་ན།
འབྱུང་པོའི་བྱ་རྣམས་ལོང་བར་འགྱུར།

ཤེས་རབ་ལྡན་པས་ཉེས་པ་དག
སེལ་བར་ནུས་ཀྱི་བླུན་པོས་མིན།
ནམ་མཁའ་ལྡིང་གིས་དུག་ཅན་སྦྲུལ།
གསོད་པར་ནུས་ཀྱི་ཁྭ་ཏས་མིན།

བློ་གྲོས་ཆེན་པོ་རྒུད་ན་ཡང༌།
ལྷག་པར་བློ་གྲོས་སྟོབས་ལྡན་འགྱུར།
རི་དྭགས་རྒྱལ་པོ་བཀྲེས་པ་ན།
གླང་ཆེན་སྤྱི་བོ་མྱུར་དུ་འགེམས།

མཁས་པ་རྩད་ཅིང་མ་དྲིས་པ།
དེ་ཡི་བར་དུ་གཏིང་མི་དཔོགས།
རྔ་ལ་དབྱུག་གུས་མ་བསྣུན་པ།
དེ་སྲིད་གཞན་དང་ཁྱད་ཅི་ཡོད།

རིག་པ་ནང་པར་འཆི་ཡང་བསླབ།
ཚེ་འདིར་མཁས་པར་མ་གྱུར་ཀྱང༌།
སྐྱ་བ་ཕྱི་མར་བཅོལ་བ་ཡི།
ནོར་ལ་རང་ཉིད་ལེན་པ་འདྲ།

ཡོན་ཏན་ལྡན་ན་སྐྱེ་བོ་ཀུན།
མ་བསྡུས་པར་ཡང་རང་ཉིད་འདུ།
དྲི་ལྡན་མེ་ཏོག་རྒྱང་རིང་ཡང༌།
བུང་བ་སྤྲིན་གྱི་ཚོགས་བཞིན་འཁོར།དམན་པ་ལོངས་སྤྱོད་ཆེ་ན་ཡང༌།
རིགས་ལྡན་རྒུད་པས་ཟིལ་གྱིས་གནོན།
བཀྲེས་པ་སྟག་གི་ངར་སྒྲ་ཡིས།
སྤྲེའུ་ཤིང་གི་རྩེ་ལས་ལྷུང༌།

བླུན་པོའི་ཡོན་ཏན་ཁར་འབྱིན་ཏེ།
མཁས་པའི་ཡོན་ཏན་ཁོང་དུ་སྦེད།
སོག་མ་ཆུ་ཡི་སྟེང་དུ་འཕྱོ།
ནོར་བུ་སྟེང་དུ་བཞག་ཀྱང་འབྱིང༌།

ཡོན་ཏན་ཆུང་རྣམས་ང་རྒྱལ་ཆེ།
མཁས་པར་གྱུར་ན་དུལ་བར་གནས།
ཆུ་ཕྲན་རྟག་ཏུ་ཀུ་ཅོ་ཆེ།
རྒྱ་མཚོ་ཅ་ཅོ་ག་ལ་སྒྲོགས།

སྐྱེ་བོ་དམན་རྣམས་དམ་པ་ལ།
ཁྱད་གསོད་བྱེད་ཀྱིས་དམ་པས་མིན།
སེང་གེས་ཝ་ཚོགས་ལེགས་སྐྱོང་སྟེ།
ཝ་ཉིད་ཝ་ཡི་རིགས་ལ་སྡང༌།

དམ་པ་ཁྲོས་ཀྱང་བཏུད་ན་ཞི།
དམན་རྣམས་བཏུད་ན་ལྷག་པར་རེངས།
གསེར་དངུལ་སྲ་ཡང་བཞུ་ནུས་ཀྱི།
ཁྱི་ལུད་བཞུས་ན་དྲི་ངན་འབྱུང༌།

མཁས་ལ་ཡོན་ཏན་ཀུན་ལྡན་ཏེ།
བླུན་པོ་ལ་སྐྱོན་འབའ་ཞིག་ཡིན།
རིན་པོ་ཆེ་ལས་དགོས་དགུ་འབྱུང༌།
སྦྲུལ་གདུག་ལས་ནི་ཉེས་ཀུན་བསྐྱེད།

སྡིག་སྤྱོད་ནགས་ན་གནས་ཀྱང་ཉམས།
དམ་པ་གྲོང་ན་གནས་ཀྱང་དུལ།
ནགས་ཀྱི་གཅན་གཟན་ཁྲོ་བ་དང༌།
རྟ་མཆོག་གྲོང་གནས་དུལ་བར་མཐོང༌།

སྐྱེས་མཆོག་རང་གི་སྐྱོན་ལ་ལྟ།
སྐྱེ་བོ་ངན་པ་གཞན་སྐྱོན་འཚོལ།
རྨ་བྱ་རང་གི་ལུས་ལ་རྟོག
སྲིན་བྱ་གཞན་ལ་ལྟས་ངན་གཏོད།

དམ་པ་དུལ་བས་རང་གཞན་སྐྱོང༌།
ངན་པ་རེངས་པས་རང་གཞན་སྡུག
འབྲས་ལྡན་ཤིང་གིས་རང་གཞན་སྲུང༌།
ཤིང་སྐམ་རེངས་པས་རང་གཞན་སྲེག

འབྱོར་བའི་དུས་ན་ཐམས་ཅད་གཉེན།
གལ་ཏེ་རྒུད་ན་ཀུན་ཀྱང་དགྲ།
རིན་ཆེན་གླིང་དུ་རིང་ནས་འདུ།
མཚོ་བསྐམས་པ་ན་སུ་ཡང་སྤོང༌།མང་པོ་གཅིག་ཏུ་བློ་མཐུན་ན།
ཉམ་ཆུང་གིས་ཀྱང་དོན་ཆེན་འགྲུབ།
སྲོག་ཆགས་གྲོག་མའི་ཚོགས་འདུས་པས།
སེང་གེའི་ཕྲུ་གུ་བསད་ཅེས་གྲགས།

ཞུམ་བཅས་སྩོལ་བ་དོར་བའི་མི།
མཐུ་སྟོབས་ལྡན་ཡང་རྒུད་པར་འགྱུར།
གླང་པོ་ཤིན་ཏུ་སྟོབས་ལྡན་ཡང༌།
གླང་རྫེས་ཆུང་ངུས་བྲན་བཞིན་འཁོལ།

ང་རྒྱལ་རྩོལ་བ་ཆེར་བསྐྱེད་ན།
ཆེན་པོ་རྣམས་ཀྱང་ཟིལ་གྱིས་གནོན།
དུང་དཀར་ཤིན་ཏུ་ལུས་ཆུང་ཡང༌།
ཆུ་སྲིན་ཆེན་པོའི་གཤེད་མ་ཡིན།

ཆེན་པོས་ང་རྒྱལ་བྱ་མི་དགོས།
ངན་པས་ང་རྒྱལ་བྱས་ཅི་ཕན།
རིན་ཆེན་ཚིག་གིས་སྒྲོགས་མི་དགོས།
མཆིང་བུ་བསྒྲགས་ཀྱང་སུ་ཞིག་ཉོ།

བདག་ཉིད་ཆེན་པོའི་འབྱོར་པ་རྟག
སྐྱེས་ངན་ཕུན་ཚོགས་རྒུད་ལ་ཉེ།
ཉི་མ་རྒྱུན་དུ་འོད་འབྱིན་ཏེ།
ཟླ་བ་ཉ་བར་གྱུར་ནས་འབྲི།

རྒྱལ་པོས་གོ་འཕང་བསྟོད་དྲགས་ན།
དེ་ཡི་ཐ་མ་བརླག་པའི་རྒྱུ།
སྒོ་ང་མཁའ་ལ་འཕངས་གྱུར་ན།
ཆག་པ་ཉིད་ལས་གཞན་ཅི་འབྱུང༌།

སྐྱེ་བོ་ཕལ་ཆེར་རང་ཉིད་དང༌།
མཐུན་པའི་རིགས་ཀྱིས་གནོད་པ་སྐྱེལ།
ཉི་མའི་འོད་ཟེར་ཤར་བ་ན།
འོད་ཟེར་གཞན་རྣམས་བརླག་པར་འགྱུར།

ཕན་བྱེད་དགྲ་བོ་ཡིན་ཡང་བསྟེན།
གཉེན་ཡང་གནོད་ན་སྤང་བར་བྱ།
རྒྱ་མཚོའི་ནོར་བུ་རིན་གྱིས་ཉོ།
ཁོང་པའི་ཟུག་རྔུ་སྨན་གྱིས་འབྱིན།

ནང་དུ་ཅུང་ཟད་འབྱོར་གྱུར་ན།
ཕྱི་རུ་དྲེགས་པའི་རྣམ་འགྱུར་སྟོན།
ཆུ་ཡིས་ཡོངས་སུ་གང་བའི་ཚེ།
སྤྲིན་རྣམས་གཡོ་ཞིང་འབྲུག་སྒྲ་སྒྲོགས།

ཡོན་ཏན་ཀུན་ལྡན་དཀོན་པ་ལྟར།
ཡོན་ཏན་ཅི་ཡང་མེད་པའང་དཀོན།
སྐྱོན་དང་ཡོན་ཏན་འདྲེས་པ་ལས།
ཡོན་ཏན་གཙོ་ཆེ་མཁས་པས་བསྟེན།བློ་ལྡན་བྱ་བ་ཅུང་ཟད་ཀྱང༌།
རྒྱུན་དུ་གྲོས་ཀྱིས་བསྒྲུབ་པར་བྱ།
གྲུབ་པར་གྱུར་ན་ལྟ་ཅི་སྨོས།
མ་གྲུབ་ན་ཡང་མཛེས་པའི་རྒྱུ།

སེམས་ཅན་མོས་པ་སྣ་ཆོགས་པས།
ཐམས་ཅད་མགུ་བ་སུས་ཀྱང་དཀའ།
རང་ཉིད་ཡོན་ཏན་ལྡན་བྱས་ན།
ཐམས་ཅད་དགའ་བ་དེ་ལ་ཉེ།

ཤིན་ཏུ་རྒས་པར་གྱུར་ཚེ་ཡང༌།
ཐོས་པ་མང་དུ་གསག་པར་བྱ།
ཕྱི་མར་ཐོས་པས་ཕན་པ་ཙམ།
སྦྱིན་པ་ཡིས་ཀྱང་ག་ལ་ཕན།

ཡོན་ཏན་ཀུན་རྫོགས་སྐྱེ་བོ་བསྟེན།
ཡང་ན་ཐ་མལ་འགྲོགས་པ་བདེ།
བུམ་པ་ཆུ་ཡིས་གང་བ་འམ།
ཡང་ན་སྟོང་པར་ཁུར་བ་སླ།

ཡོན་ཏན་ཅུང་ཟད་བསླབས་པའི་མི།
སུ་ཞིག་གིས་ནི་བསྟེན་པར་ནུས།
ཆུས་ཕྱེད་གང་བའི་བུམ་པ་དེ།
མགོ་ལ་འཁུར་བ་སུ་ཡིས་ནུས།


མི་གང་སྐྱ་བོ་དམ་པ་དང༌།
དམན་པའི་ཁྱད་པར་ལེགས་ཤེས་ནས།
དེ་ཡི་བྱ་བ་བསྒྲུབ་ཤེས་པ།
ཕུན་སུམ་ཚོགས་པའི་གཞི་ཆེན་ཡིན།

བློ་གྲོས་ལྡན་པས་ལེགས་བསྐྱངས་ན།
སྐྱེ་བོ་དམན་པའང་མཆོག་ཏུ་འགྱུར།
སློབ་ཤེས་དག་གིས་ནེ་ཙོ་ལ།
བསླབས་ན་འདོན་པ་ཤེས་པར་འགྱུར།

ཉམས་སྟོབས་ཆུང་བའི་སྐྱེ་བོས་ཀྱང༌།
ཆེན་པོ་གཞན་ལ་བསྟེན་ན་འགྲུབ།
ཆུ་ཡི་ཐིགས་པ་ཉམ་ཆུང་ཡང༌།
མཚོ་དང་འདྲེས་ན་སྐེམ་མི་ནུས།

རང་ལ་བློ་གྲོས་མི་ལྡན་ན།
བློ་ཆེན་གཞན་ལ་ལེགས་པར་འདྲི།
ལག་པས་དགྲ་བོ་མི་གསོད་ན།
མཚོན་ཆ་ལེན་པར་མི་བྱེད་དམ།

གནོད་པར་བྱེད་པའི་དགྲ་བོ་ཡང༌།
ཐབས་དང་ལྡན་ན་གྲོགས་སུ་འགྱུར།
དུག་ཆེན་ལུས་ལ་གནོད་མིད་ཀྱི།
སྦྱོར་བ་ཤེས་ན་སྨན་དུ་འགྱུར།རིགས་རྒྱུད་ཕྱུག་པོར་བྱ་སྙམ་ནས།
རང་ཉིད་བཙོངས་ནས་བུ་ལ་སྟེར།
བུ་ངན་ཕ་ལ་རྒོལ་བཞིན་དུ།
ནོར་རྣམས་བརླགས་ནས་ཁྱི་བཞིན་འཁྱམས།

ཇི་ལྟར་ཕ་མ་བུར་བྱམས་ཀྱང༌།
དེ་ལྟར་བུ་ཚས་ཕ་མ་མིན།
ཕ་མས་བུ་ཚ་བསྐྱངས་བསྐྱངས་ནས།
ཕ་མ་རྒས་ནས་བུ་ཚས་བརྙས།

ནོར་གསོག་འཇུངས་པའི་ཕྱུག་པོ་དང༌།
དགོས་སར་གཏོང་བའི་ཕྱུག་པོ་གཉིས།
རང་དང་རིགས་རྒྱུད་གཉིས་ཀ་ལ།
འཇིག་རྟེན་གཞན་གྱི་བྱེ་བྲག་འབྱེད།

སྲིད་པའི་ཁོལ་པོར་གྱུར་པ་རྣམས།
སྲོག་དང་བསྡོས་ནས་ནོར་ཕྱིར་འབྲེང༌།
ཆོག་ཤེས་ཅན་གྱིས་ནོར་རྙེད་ཀྱང༌།
དེས་པ་བཞིན་དུ་གཞན་ལ་སྟེར།

བདོག་པ་བཏང་བས་སྦྱིན་པ་རྫོགས།
དེ་ལ་ཁྲོ་ན་བཟོད་པ་འཕེལ།
ཚིམ་ན་རྗེས་སུ་ཡི་རངས་བསྒོམས།
དེས་ན་སྦྱིན་པ་ཆོས་ཀྱི་མཆོག


སྡུག་བསྔལ་རྒྱ་མཚོའི་སྣོད་གྱུར་པའི།
ལུས་འདི་དགྲ་དང་འདྲ་མོད་ཀྱི།
བློ་དང་ལྡན་པས་འཁོལ་ཤེས་ན།
འདི་ལ་བསོད་དམས་རྟེན་དུ་རུང༌།

སྐད་ཅིག་འཇིག་པའི་ཚེ་ལ་ཡང༌།
དགེ་བའི་བག་ཆགས་རིང་དུ་ཁྱེར།
རླུང་གིས་བསྒོས་པའི་ཙན་དན་དྲི།
རིང་དུ་ཐུལ་ཡང་དགའ་བ་སྐྱེ།

ཡུན་རིང་བདེ་བ་སྤྱད་སྤྱད་ཀྱང༌།
འབྲལ་བའི་སྡུག་བསྔལ་ལྷག་པར་ཆེ།
རང་དབང་མེད་པར་འཆི་དགོས་པ།
འདི་ལ་རྟག་འཛིན་དེ་དག་བརླག

གཉེན་བཤེས་ཀུན་གྱིས་མཁའ་བསྐོར་ཏེ།
བཅོམ་བསྐྱུངས་མིག་རྩ་ཤིན་ཏུ་ཞན།
གང་ཕྱོགས་འགྲོ་བའི་གཏོལ་མེད་པ།
དེ་ཚེ་དགེ་བ་གཞན་རྣམས་ཕུང༌།

ངན་སོང་གསུམ་གྱི་ནད་རྣམས་ནི།
མ་བྱུང་བ་ནས་གསོ་བར་བྱ།
གནམ་ལྕགས་མགོ་ལ་བབ་པ་ལྟར།
ཐོག་ཏུ་བབས་ན་ཅི་བྱར་ཡོད།མཛའ་བཤེས་ཀུན་དང་བྲལ་བ་དང༌།
ངེས་པར་འཆི་བ་ཤེས་བཞིན་དུ།
ད་དུང་བདེ་བར་གཉིད་ཕེབས་པ།
བདག་ཉིད་སྙིང་ལ་ཅི་ཞིག་ཞུགས།

གང་གིས་བརྩོན་པར་མི་ནུས་ཀྱང༌།
ཅི་ནས་ངན་འགྲོར་མི་ལྟུང་བྱ།
དཔའ་བོས་དགྲ་སྡེ་མ་བསད་ནའང༌།
རང་ཕྱོགས་གསོད་པར་བྱེད་དམ་ཅི།

འཕྲལ་དུ་ཅུང་ཟད་སྡུག་ན་ཡང༌།
རྒྱུན་དུ་བདེ་བ་མཁས་པས་བསྟེན།
གཏར་བསྲེག་དག་གིས་ནད་འདོན་པ།
སྨན་པ་མཁས་པའི་གཞུང་ལུགས་ཡིན།

གལ་ཏེ་གཞན་དག་ཕུན་ཚོགས་པས།
བདག་གི་ཡིད་ལ་མི་བཟོད་ན།
དེ་ཡིས་རང་འབྱོར་འཇོམས་པའི་ཕྱིར།
རང་ལ་ཕྲག་དོག་བྱེད་པར་ཟད།

གནོད་པ་བྱ་ཕྱིར་དགྲ་འཇོམས་ན།
ཁྱེད་ཀྱིས་ཁྲོ་བ་ཁོ་ན་ཆོམས།
ཁྲོ་བས་འཁོར་བ་ཐོག་མེད་ནས།
བདག་ལ་གནོད་པ་མཁའ་ལས་འདས།


གལ་ཏེ་དགྲ་ཀུན་བརླག་འདོད་ན།
བསད་པས་དེ་ཀུན་ག་ལ་འཛད།
རང་གི་ཁྲོ་བ་གཅིག་བཅོམ་པས།
དགྲ་ཀུན་ཅིག་ཅར་བསད་པ་ཡིན།

མཐུ་ཆེན་གཟུ་ལུམ་སྤྱོད་པ་ལ།
ཁྲོས་ན་རང་ལ་ལྷག་པར་གནོད།
དམ་པ་ཉེ་བར་ཞི་བ་ལ།
ཁྲོ་བར་བྱ་རྒྱུ་ག་ལ་ཡོད།

སྡོང་བུ་གཅིག་ལས་སྐྱེས་པ་ཡི།
རྩྭ་རྣམས་རླུང་གིས་ཕྱོགས་བཅུར་སྟོར།
དེ་བཞིན་ལྷན་ཅིག་སྐྱེས་པ་ཡིས།
སྐྱེ་བོ་ལས་ཀྱིས་སོ་སོར་འབྲལ།

སྔོན་ཆད་མ་མཐོང་འབྲེལ་བར་འཐམ།
དེ་ནས་སླར་ཡང་གཞན་འགྲོ་བའི།
མི་དེ་བདག་དང་ཅིར་འབྲེལ་ན།
ཤི་ནས་མྱ་ངན་ཆེན་པོ་བྱེད།

རང་དོན་འབད་པས་བསྒྲུབ་འདོད་ན།
དེ་ཡིས་དང་པོར་གཞན་དོན་སྒྲུབས།
རང་དོན་ཁོ་ན་གཙོར་བྱེད་པ།
དེ་ཡིས་རང་དོན་འགྲུབ་མི་སྲིད།མི་གང་གཞན་དོན་གཙོར་བྱས་ན།
གཡོ་ཅན་རང་དོན་སྒྲུབ་པ་འདྲ།
རང་དོན་འབའ་ཞིག་གཙོར་བྱེད་པ།
གཞན་མགོ་འདོན་ཕྱིར་དྲང་བ་འདྲ།

བློ་ལྡན་ཚེ་འདི་སྒྲུབ་ན་ཡང༌།
ཆོས་ཀྱིས་སྒྲུབ་ན་བདེ་བར་འགྲུབ།
དམ་པ་རྣམས་དང་ཆོམ་རྐུན་གྱི།
ཕུན་སུམ་ཚོགས་པའི་ཁྱད་པར་ལྟོས།

མི་རྣམས་ཚེ་ཐུང་དེ་ཡི་ཕྱེད།
མཚན་མོ་གཉིད་ལོག་ཤི་དང་འདྲ།
ན་རྒས་སྡུག་བསྔལ་སྣ་ཚོགས་ཀྱིས།
ཕྱེད་པོའང་བདེ་བར་སྤྱད་དུ་མེད།

སྐྱེ་བོ་ཀུན་གྱི་དྲུང་སྡོད་པའི།
འཆི་བདག་གལ་ཏེ་མངོན་སུམ་མཐོང༌།
བྱ་བ་གཞན་དག་ལྟ་ཅི་སྨོས།
ཟ་བར་དྲན་པའི་ནུས་པ་མེད།

ཁྱོད་ཀྱིས་བྱ་བ་ཟིན་ནམ་ཞེས།
འཆི་བདག་སྡོད་པར་མི་འགྱུར་གྱིས།
ངེས་པར་བྱ་དགོས་ཡོད་ན་ནི།
དེ་རིང་ཉིད་དུ་བརྟུན་ལ་གྱིས།


བདག་གིས་བྱ་བ་མ་ཟིན་པས།
རེ་ཞིག་དེ་རིང་ཁྱོད་བཞུགས་ཞེས།
མཆི་མས་བརྣངས་ཏེ་གསོལ་བཏབ་ཀྱང༌།
འཆི་བདག་བཅོས་སུ་ག་ལ་རུང༌།

འདུ་འཛི་སྤངས་པ་བདེ་བ་སྟེ།
མིན་ན་བཟང་པོ་རྣམས་དང་འགྲོགས།
དུག་སྦྲུལ་གསོ་བ་གང་ལ་རུང༌།
གསོ་ན་བཟླས་བརྗོད་བརྩོན་པར་བྱ།

སེམས་ནི་རྣམ་པར་གཡེངས་པ་ལ།
དམ་ཆོས་སྒྲུབ་པའི་གོ་སྐབས་མེད།
ཉེ་བར་ཞི་བར་གནས་པ་ལ།
སེམས་ནི་ལས་རུང་ཤིན་ཏུ་ཉེ།

དམིགས་པ་ཀུན་ལ་རབ་མཁས་ཤིང༌།
ཏིང་ངེ་འཛིན་གྱིས་སེམས་དུལ་བ།
འཕགས་པའི་ཆོས་ལ་རབ་སྦྱངས་པ།
ཡོན་ཏན་ཀུན་གྱི་ཞིང་ས་ཡིན།

བླུན་པོ་སློབ་པ་ངོ་ཚར་འཛིན།
མཁས་རྣམས་མ་བསླབས་ངོ་ཚར་འཛིན།
དེས་ན་མཁས་པ་རྒས་གྱུར་ཀྱང༌།
ཕྱི་མའི་དོན་དུ་རིག་པ་སློབ།ཤེས་རབ་མེད་པའི་རྒྱུ་མཚན་གྱིས།
བླུན་པོ་ཡོན་ཏན་མི་སློབ་ལོ།
བརྟགས་ན་ཤེས་རབ་མེད་ཉིད་ཀྱིས།
བླུན་པོས་འབད་པ་ལྷག་པར་དགོས།

སྐྱེ་བ་སྔ་མར་མ་བསླབས་པས།
ཚེ་འདིར་བླུན་པོར་མཐོང་བས་ནི།
ཕྱི་མར་བླུན་པོར་སྐྱེས་དོགས་པས།
ཚེ་འདིར་དཀའ་ཡང་འབད་དེ་མཉན།

བསྒོམས་ན་ཐོས་པ་མི་དགོས་ཞེས།
བླུན་པོ་བློ་རྒྱ་ཆུང་ངུ་སྨྲ།
ཐོས་པ་མེད་པར་བསྒོམ་པ་ཙམ།
འབད་ཀྱང་དུད་འགྲོའི་སྒྲུབ་ཐབས་ཡིན།

རྒྱུ་འབྲས་བསླུ་བ་མེད་པ་འདི།
ཐམས་ཅད་མཁྱེན་པའི་ཁྱད་ཆོས་ཡིན།
མ་བསླབས་པ་ལ་ཀུན་མཁྱེན་དུ།
འགྲོ་ན་རྒྱུ་འབྲས་ག་ལ་བདེན།

ཐོས་པ་མེད་པའི་བསྒོམ་པ་དེ།
རེ་ཞིག་གྲུབ་ཀྱང་མྱུར་དུ་འཇིག
གསེར་དངུལ་ལེགས་པར་བཞུ་ན་ཡང༌།
མེ་དང་བྲལ་ན་སྲ་བར་འགྱུར།


ཤེས་རབ་ཀྱིས་ནི་གཏིང་བརྟགས་ནས།
ཉེས་རྒྱུ་སྤོང་བ་སྒོམ་པ་ཡིན།
ལུས་ཀྱི་དྲི་མ་བཀྲུས་པ་ལྟར།
བསྒོམས་ཀྱང་རིང་ཞིག་ལོན་ནས་ལྡོག

རྒྱུ་འབྲས་ཕུལ་བྱུང་མ་ཚོགས་པར།
བདག་མེད་རྟོགས་ཀྱང་འཚང་མི་རྒྱ།
ཐབས་མཆོག་དག་གིས་མ་བསྒྲུབས་པའི།
བདེན་པར་མཐོང་ཡང་དགྲ་བཅོམ་མིན།

དེས་ན་ཆོས་རྣམས་ལེགས་རྟོགས་ཏེ།
ཏིང་ངེ་འཛིན་ལ་སེམས་བཞག་ན།
ཉེས་པ་བག་ཆགས་དང་བཅས་པ།
གང་གིས་སྤངས་པ་རྫོགས་འཚང་རྒྱ།

གང་ལ་བློ་གྲོས་མི་ལྡན་ན།
བསྟན་བཅོས་ལེགས་ཀྱང་སུ་ཞིག་ལེན།
ནོར་བུས་སྤྲས་པའི་གསེར་གྱི་རྒྱན།
མཛེས་ཀྱང་བ་ལང་ག་ལ་བལྟ།

མཁས་པ་རྣམས་ཀྱིས་ལེགས་བཤད་ཀུན།
ཤིན་ཏུ་བདེན་པར་གོ་བཞིན་ཏུ།
དེ་དོན་ཉམས་སུ་མི་ལེན་ན།
བསྟན་བཅོས་ཤེས་ཀྱང་ཅི་ཞིག་བྱ།
རང་ལ་དགོས་པའི་བསྟན་བཅོས་རྣམས།
ཉི་མ་རེ་རེར་ཚིག་རེ་བཟུང༌།
གྲོག་མཁར་དང་ནི་སྦྲང་རྩི་ལྟར།
རིང་པོར་མི་ཐོགས་མཁས་པར་འགྱུར།

ལེགས་པར་སྤྱོད་ལ་འཇུག་འདོད་ན།
ཅི་ནས་འདི་ཡི་ཁ་མཉན་ཏེ།
དམ་པ་ཀུན་ཏུ་སྲན་བཙུགས་ནས།
སྲོག་ལ་བབས་ཀྱང་ལུགས་བཞིན་བསྐྱང༌།

དེ་ལ་འབད་པས་གཞུང་ལུགས་ནས།
འབྱུང་བཞིན་གཉེན་པོས་བསྒྲུབ་ནུས་ན།
མཁས་རྣམས་རྫུན་པ་མི་གསུང་གིས།
འདི་ཡི་ཕན་ཡོན་ཕྱི་ནས་ལྟོས།

སྔོན་ཡང་འདི་བཞིན་སྤྱད་རྣམས་འཕེལ།
ད་ལྟ་ན་ཡང་དེ་ལྟར་མཐོང༌།
གཏན་ཚིགས་བཟང་པོ་འདི་ཡིས་ནི།
མ་འོངས་རྣམས་ཀྱང་ཕུན་ཚོགས་འཐོབ།

བློ་ལྡན་རང་གིས་ཤེས་ན་ཡང༌།
མཁས་པའི་གཞུང་ལུགས་གུས་པས་བལྟ།
རིན་ཆེན་ཤིན་ཏུ་བཟང་པོ་ཡང༌།
མ་བཙོངས་བར་དུ་རིན་ཐང་ཆུང༌།

ནགས་ཚལ་ཤིན་ཏུ་མང་མོད་ཀྱང༌།
ཙན་དན་ས་མཆོག་སྐྱེ་བ་ཉུང༌།
དེ་བཞིན་མཁས་པ་མང་ན་ཡང༌།
ལེགས་བཤད་འབྱུང་བ་ཤིན་ཏུ་དཀའ།

རྟ་མཆོག་འགྲོ་བའི་ཚེ་ན་ཤེས།
གསེར་དངུལ་བཞུ་ན་ཤེས་པར་འགྱུར།
གླང་ཆེན་གཡུལ་ངོར་ཤེས་འགྱུར་ཏེ།
མཁས་པ་ལེགས་བཤད་རྩོམ་ན་ཤེས།

གང་ཞིག་འཇིག་རྟེན་ཐམས་ཅད་ཀྱིས།
རང་ལ་ཚད་མར་བྱེད་འདོད་ན།
དེ་ཡིས་གཞུབ་འདི་ལེགས་བརྟགས་ཏེ།
གཉེན་པོ་བསྐྱེད་ལ་འབད་དེ་བསྒྲུབ།

འཇིག་རྟེན་བྱ་བ་ལེགས་ཤེས་པ།
དེ་ཡིས་དམ་པའི་ཆོས་ལུགས་འགྲུབ།
དེས་ན་ཆོས་ལུགས་སྤྱོད་པ་དེ།
བྱང་ཆུབ་སེམས་དཔའི་རྣམ་ཐར་ཡིན།

ལེགས་པར་བཤད་པ་རིན་པོ་ཆེའི་གཏེར་ལས་ཆོས་བརྟག་པ་ཞེས་བྱ་བ་རབ་ཏུ་བྱེད་པ་དགུ་པའོ།འཚོ་བྱེད་ཟས་སུ་སྒྲོ་བཏགས་ནས།
སྨན་གྱིས་ནད་ཆེན་གསོ་བ་ལྟར།
འཇིག་རྟེན་ལུགས་ཀྱི་རྗེས་འབྲངས་ནས།
བདག་གིས་དམ་པའི་ཆོས་འདི་བསྟན།
ཐོས་པ་རྒྱ་མཚོའི་གླིང་ལས་ལེགས་འཁྲུངས་ཤིང༌།
བློ་གྲོས་ཀླུ་ཡི་དབང་པོས་ལེགས་བཟུང་བའི།
དཔལ་ལྡན་ལེགས་པར་བཤད་པའི་རིན་ཆེན་གཏེར།
བློ་གསལ་བློ་ཡི་བང་མཛོད་དགང་བ་དང༌།
མཁས་པ་རྣམས་ཀྱི་འདོད་དགུ་བསྒྲུབ་པའི་ཕྱིར།
ཤཱཀྱའི་དགེ་སློང་ཀུན་དགའ་རྒྱལ་མཚན་དཔལ།
བཟང་པོས་དགེ་བའི་ཡིད་ཀྱིས་ལེགས་བརྟགས་ནས།
ཕྱོགས་རྣམས་གསལ་བར་བྱ་ཕྱིར་འདི་ཕྱེའོ།
དེ་ལས་བྱུང་བའི་དགེ་བ་དྲི་མ་མེད།
བསིལ་ཟེར་བྱེད་པའི་འོད་ལྟར་རབ་གསལ་བས།
སྐྱེ་བོའི་སྙིང་གི་མུན་པ་ཕྱིར་བསལ་ཏེ།
བློ་གསལ་བློ་ཡི་ཀུ་མུད་རྒྱས་གྱུར་ཅིག
ཤེས་བྱ་ཀུན་ལ་རབ་སྦྱངས་པས།
ཐམས་ཅད་མཁྱེན་པ་ཐོབ་པའི་ཕྱིར།
དེས་ན་བདག་གི་བསྟན་བཅོས་འདི།
རྫོགས་པའི་སངས་རྒྱས་ཐོབ་ཕྱིར་བྱས།
ལེགས་པར་བཤད་པ་རིན་པོ་ཆེའི་གཏེར་ཞེས་བྱ་བའི་བསྟན་བཅོས་ཡུལ་བྱང་ཕྱོགས་ཀྱི་རྒྱུད་
ཁ་བ་ཅན་གྱི་ལྗོངས།བྱང་ཆུབ་སྙིང་པོ་རྡོ་རྗེའི་གདན་ལས་དཔག་ཚད་བརྒྱ་བགྲོད་པའི་གནས།གཙང་ལ་སྟོད་
གྲོམ་པ་དཔལ་ས་སྐྱའི་གཙུག་ལག་ཁང་ན་གནས་པ།འཇམ་པའི་དབྱངས་ཀྱི་ཐུགས་ཀྱི་འོད་ཟེར་གྱི་བློའི་པདྨའི་
ཟེའུ་འབྲུ་ཅུང་ཟད་ཁ་བྱེ་བས།སྒྲ་དང༌།ཚད་མ་དང༌།སྙན་ངག་དང༌།སྡེབ་སྦྱོར་དང༌།ཚིག་གི་རྒྱན་དང༌།
བདེ་བར་གཤེགས་པའི་གསུང་རབ་ཀྱི་དོན་ཡོངས་སུགྲགས་པ་ཕལ་མོ་ཆེ་ཐོས་ཤིང་རྟོགས་ནས་ཁོང་དུ་ཆུད་ཅིང་
འདྲིས་པར་བྱས་པས།ལུང་དང༌།རིགས་པ་དང༌།མན་ངག་གི་གནད་ཕྱིན་ཅི་མ་ལོག་པར་བློ་གྲོས་ཀྱི་སྣང་བ་ཐོབ་པ།
འཆད་པ་དང༌།རྩོམ་པ་དང༌།རྩོད་པ་ལ་སོགས་པའི་ཆུལ་ལ་སྤོབས་པ་དགེ་བ་ཅན།ཤཱཀྱའི་དགེ་སློང་རིགས་པར་སྨྲ་བ་
ཀུན་དགའ་རྒྱལ་མཚན་དཔལ་བཟང་པོ་ཞེས་བྱ་བས
དཔལ་ས་སྐྱའི་དགོན་པར་ལེགས་པར་སྤྱད་པ་རེ་ཞིག་རྫོགས་སོ།མངྒ་ལམ།
 
 
 
 
 
 
 
 
 

དཔྱད་བརྗོད་གསར་པ།དཔྱད་བརྗོད་ཀྱི་གྲངས་ཀ1
དཔྱད་པ་བརྗོད་པ།
དཔྱད་བརྗོད་ཀྱི་ནང་དོན།:ཡིག་འབྲུ་ལྔ་བརྒྱ་ལས་འདས་མི་ཆོག
རུས་མིང་།: གསང་རྟགས:
གསང་མིང་།
ཐོ་བཀོད།