བྱང་ཆུབ་སེམས་དཔའ་རྟ་དབྱངས་ཀྱི་རྣམ་ཐར་བཞུགས་སོ། །

འབྱུང་གནས།:ཧྲན་ཡང་རྒྱལ་སྐྱོང་ཆོས་འཁོར་གླིང་། རྩོམ་པ་པོ།:བཞག་པ་རིན་པོ་ཆེ། དུས་ཚོད།:2013-08-24 Tag: བཀོད་པ།:

 

བྱང་ཆུབ་སེམས་དཔའ་རྟ་དབྱངས་ཀྱི་རྣམ་ཐར་བཞུགས་སོ། 

 

ཡའོ་ཆིན་སྡེ་སྣོད་གསུམ་པ་གཞོན་ནུ་སྲོག་གིས་སཾསྐྲྀཏ་ནས་རྒྱ་ནག་ཡི་གེར་བསྒྱུར་ཅིང་།

བཞག་པ་སྐྱེ་མིང་པས་༢༠༡༢ལོའི་ཟླ་བ་༡༠་ཚེས་༡༦ལ་ཟི་ལིང་གྲོང་ཁྱེར་དུ་རྒྱ་ནག་ཡི་གེ་ནས་བོད་ཡིག་ཏུ་བསྒྱུར་བའོ། 

 

བྱང་ཆུབ་སེམས་དཔའ་རྟ་དབྱངས་ཞེས་བྱ་བའི་སློབ་དཔོན་ཆེན་པོ་ཞིག་ཡོད་དེ། དེ་ནི་གནས་བརྟན་རྩིབས་ཀྱི་སློབ་མ་ཡིན་ནོ།།

དེ་ཡང་གནས་བརྟན་རྩིབས་སངས་རྒྱས་ཀྱི་ཆོས་ལ་རྟག་ཏུ་དགོངས་ཤིང་།  སུ་ཞིག་རབ་ཏུ་བྱུང་ན་ལམ་བཟང་རྒྱ་ཆེར་སྤེལ་ནས་སེམས་ཅན་རྣམས་ཀྱི་ཉམས་རྟོགས་ཀྱི་སྒོ་ཕྱེ་བར་ནུས་སྙམ་དུ་ཏིང་ངེ་འཛིན་ལ་སྙོམས་པར་ཞུགས་ནས་གཟིགས་པ་ན།རྒྱ་གར་གྱི་ཡུལ་དབུས་སུ་མུ་སྟེགས་པའི་ཆོས་ལ་རབ་ཏུ་བྱུང་བ་ཞིག                འཇིག་རྟེན་གྱི་ཤེས་རབ་དང་རྟོག་གེ་ལ་ཤིན་ཏུ་མཁས་པ་ཞིག་ཡོད་པ་དེས་འདི་སྐད་ཅེས།དགེ་སློང་རྣམས་ཀྱིས་བདག་ལ་རྩོད་པར་ནུས་ན་གཎྜི་རྡུང་ནའང་རུང་གི།གལ་ཏེ་དེ་མ་ནུས་ན་གཎྜིའི་སྒྲ་ཀུན་ཏུ་སྒྲོག་སྟེ་གཞན་གྱི་ཡོན་འབུལ་བ་དང་དུ་ལེན་པ་མི་འོས་སོ་ཞེས་ཟེར་བཞིན་ཡོད་པ་ཞིག་གཟིགས་སོ།།

དེའི་ཚེ་གནས་བརྟན་རྩིབས་རྒྱ་གར་བྱང་ཕྱོགས་ནས་ཡུལ་དབུས་སུ་ཕེབས་པར་བཞེད་ནས།

གྲོང་ཁྱེར་ཤཱཀྱ་ཞེས་པར་ཕེབས་པ་ན།ལམ་དུ་དགེ་ཚུལ་མང་པོ་དང་འཕྲད་དེ་ཀུན་གྱིས་ཀུ་རེ་རྩེད་དེ།འདི་སྐད་ཅེས།  གནས་བརྟན་བཙུན་པ་ལྷམ་ཡུ་ཐུང་དེ་བདག་ལ་བྱིན་ཅིག་ཅེས་བརྗོད་དེ་ལན་ལ་མ་སྒུག་པར་དེ་མ་ཐག་ཏུ་ཁྱེར་ནས་སོང་ཞིང་། རྒྱུ་མཚན་མེད་པའི་བརྙས་བཅོས་སྣ་ཚོགས་བྱས་སོ། 

དེ་ལ་གནས་བརྟན་རྩིབས་བཞིན་གྱི་མདོག་ཀྱང་མི་འགྱུར་བར་ཞལ་འཛུམ་བག་དང་ལྡན་པར་བཞུགས་པས།དགེ་ཚུལ་རྣམས་ཀྱི་ནང་ནས་ཐོས་པ་ཆེན་པོ་ལྡན་པ་དག་གིས་འདི་ཉིད་ཐུགས་དགོངས་ཟབ་ཅིང་རྒྱ་ཆེ་བར་ཤེས་ཤིང་། སྐྱེས་བུ་འདི་ཕལ་པ་ཞིག་མིན་པར་དོགས་ཏེ་དྲི་བ་བྱས་ཤིང་སྤྱོད་པར་བརྟག་པ་ན།གང་ཞིག་དྲིས་པའི་ལན་མ་ལུས་པ་གནང་བཞིན་འགྲོ་མཚམས་མི་འཇོག་པར་གཤེགས་ཤིང་། ཐུགས་ཀྱི་དགོངས་ཉམས་ཟབ་ཅིང་རིང་བས་གནས་སྐབས་ཀྱི་དོན་ཆུང་ལ་མི་གཟིགས་པ་ཞིག་གོ 

དེའི་ཚེ་དགེ་ཚུལ་རྣམས་ཀྱིས་གནས་བརྟན་དེ་ལ་ཟབ་རྒྱས ཀྱི་ཡོན་ཏན་བསམ་གྱིས་མི་ཁྱབ་པ་མངའ་བར་ཤེས་ནས་ལྷག་པར་དད་དེ་བསྙེན་བཀུར་དང་མཆོད་པ་བྱས་སོ། 

དེ་ནས་གནས་བརྟན་རྩིབས་མངོན་པར་ཤེས་པ་བརྟེན་ཏེ་ནམ་མཁའ་ནས་གཤེགས་སོ།   

རྒྱ་གར་གྱི་ཡུལ་དབུས་སུ་ཕེབས་ནས་དགོན་པ་ཞིག་ཏུ་བཞུགས་པ་ན།  དེའི་དགེ་སློང་རྣམས་ལ་ཅིའི་ཕྱིར་གཎྜི་ཆོས་དང་མཐུན་པར་མི་རྡུང་ཞེས་དྲིས་པས།དགེ་སློང་རྣམས་ན་རེ།གནས་བརྟན་ཉིད་ནི་རྨོངས་རྟུལ་ཞིག་སྟེ།  རྒྱུ་མཚན་དང་ལྡན་པས་ན་མི་རྡུང་ངོ་ཞེའོ།།རྒྱུ་མཚན་གང་ཡིན་ཞེས་དྲིས་པར་དེ་དག་ན་རེ།  མུ་སྟེགས་པའི་རབ་ཏུ་བྱུང་བ་རྟོག་གེ་ལ་ཤིན་ཏུ་མཁས་པ་ཞིག་ཡོད་དེ།དེས་འདི་སྐད་ཅེས།རྒྱལ་ཁབ་ནང་གི་ཤཱཀྱའི་སློབ་མ་དགེ་སྦྱོང་རྣམས་ནས་བདག་ལ་རྩོད་པར་མི་ནུས་ན་ནི།གཎྜི་ཀུན་ནས་སྒྲོག་སྟེ་ཡོན་འབུལ་བ་དང་དུ་ལེན་དུ་མི་རུང་ངོ་ཞེས་བསྒྲགས་པའི་རྒྱུ་མཚན་གྱིས་མི་རྡུང་ངོ་ཞེའོ།།

གནས་བརྟན་རྩིབས་ན་རེ།གཎྜི་རྡུང་ཞིག གལ་ཏེ་དེ་སླེབས་ན་ཁོ་བོ་ལ་ཐབས་ཡོད་དོ་ཞེའོ།།དགེ་སློང་རྙིང་པ་རྣམས་ནི་གཏམ་དེ་ལ་ཡ་མཚན་པར་གྱུར་ཅིང་རྩོད་པར་མི་ནུས་པར་དོགས་སོ།།

དེ་ནས་འདུས་ཏེ་གྲོས་བྱས་ནས་སྨྲས་པ།གཎྜི་རྡུངས་ཤིགགལ་ཏེ་མུ་སྟེགས་པ་བྱུང་ན།གནས་བརྟན་ཁོ་རང་གང་འདོད་པ་དེ་བྱེད་དུ་ཆུག་ཅིག་ཅེའོ།།དེ་ནས་གཎྜི་བརྡུངས་བས། མུ་སྟེགས་པ་ན་རེ།དེ་རིང་ཅིའི་ཕྱིར་ཤིང་དེ་རྡུང་ཞེའོ།།ལན་དུ།ཡུལ་བྱང་ཕྱོགས་ཀྱི་གནས་བརྟན་དགེ་སྦྱོང་ཞིག་བྱུང་ནས་གཎྜི་རྡུང་གི་ཁོ་བོ་ཅག་མིན་ནོ་ཞེའོ།མུ་སྟེགས་པ་ན་རེ།དེ་ཁྲིད་ནས་ཤོག་ཅིག་ཞེས་སྨྲས་པས།དེ་བྱུང་ནས་ཕན་ཚུན་མཇལ་ལོ།།

དེ་ལ་མུ་སྟེགས་པ་ན་རེ།རྩོད་པར་འདོད་དམ།།ལན་དུ་སྨྲས་པ།འདོད་དོ་ཞེའོ།།མུ་སྟེགས་པས་བཞིན་འཛུམ་བག་དང་བཅས་ཏེ་སྨྲས་པ།གནས་བརྟན་དགེ་སློང་འདི་ནི་མདོག་གཟུགས་འདི་ཙམ་དུ་ཟད་ཅིང་སྨྲ་བརྗོད་ཀྱང་ཕལ་པ་ལས་མ་འདས་པ་ཞིག་ན།  ཇི་ལྟར་ན་བདག་ལ་རྩོད་འདོད་པ་ཡིན་ནམ་ཞེའོ།  །དེ་ནས་ཕན་ཚུན་བགྲོས་ཏེ་ཉིན་བདུན་གྱི་རྗེས་སུ་རྒྱལ་པོ་དང་བློན་པོ་དང་དགེ་སྦྱོང་དང་མུ་སྟེགས་པ་ལ་སོགས་པ་འཚོགས་པའི་དབུས་སུ།  སློབ་དཔོན་ཆེན་པོ་རྣམས་ཀྱིས་རྩོད་པར་ཐག་བཅད་དོ། 

ཉིན་དྲུག་པ་ལ་སླེབས་པའི་མཚན་མོར་གནས་བརྟན་རྩིབས་ཏིང་ངེ་འཛིན་ལ་སྙོམས་པར་ཞུགས་ནས་ཇི་ལྟ་བུས་འདུལ་བ་འོས་པར་གཟིགས་ཤིང་།ཉིན་བདུན་པའི་ནམ་ལངས་པ་དང་ཚོགས་པ་ཆེན་པོ་འདུས་པ་ན།  །གནས་བརྟན་རྩིབས་སྔོན་དུ་ཕེབས་ཏེ་ཁྲི་འཕངས་མཐོན་པོ་ལ་འཁོད་པས།  བཞིན་རས་མདངས་རྒྱུན་པ་ལས་ལྷག་པར་གསལ་ཞིང་ཐུགས་སྤྲོ་ལྷོད་ཀྱི་ཉམས་དང་བཅས་ཏེ་བཞུགས་སོ། 

མུ་སྟེགས་པ་དེ་རྗེས་སུ་བྱུང་ནས་མདུན་དུ་འདུག་སྟེ་དགེ་སྦྱོང་ལ་བལྟས་པས།  བཞིན་རས་འཛུམ་བག་དང་ལྡན་ལ་ཐུགས་བདེ་ཞིང་ལྷོད་པ་དང་། ཡང་སྐུའི་ཆ་བྱད་གང་ལའང་རྩོད་པའི་ཉམས་འགྱུར་དང་ལྡན་པས། སེམས་ལ་འདི་ནི་དགེ་སློང་འཕགས་པ་ཞིག་མིན་ནམ་།  འདིའི་ཐུགས་དགོངས་ནི་བརྟན་ཅིང་སྤྲོ་ལ་རྩོད་པའི་ཉམས་འགྱུར་དང་ཡང་ལྡན་པས།  དེང་གི་རྩོད་གླེང་ནི་ཁྱད་པར་དུ་འཕགས་པའི་རྩོད་གླེང་ཞིག་ཏུ་འགྱུར་རོ་སྙམ་མོ།   

དེ་ནས་གང་ཕམ་པ་དེར་ཉེས་པ་ཇི་ལྟར་གཅོད་པ་ཕན་ཚུན་བགྲོས་པ་ན།  མུ་སྟེགས་པ་ན་རེ།  གང་ཕམ་པ་དེའི་ལྕེ་གཅོད་དོ་ཞེའོ།  །དེ་ལ་གནས་བརྟན་རྩིབས་ན་རེ།  དེ་ནི་མི་ལེགས་ཏེ་ཕ་རོལ་པོའི་སློབ་མ་བྱེད་ན་རུང་ངོ་ཞེས་གསུངས་པས།  ལན་དུ་དེ་ལྟར་བྱའོ་ཞེའོ།  །ཡང་སུས་སྔོན་དུ་བརྗོད་ཅེས་དྲིས་པར།  གནས་བརྟན་རྩིབས་ན་རེ།  བདག་ནི་ལོ་ན་མཐོ་ཞིང་རྩོད་པའི་ཆེད་དུ་ས་ཐག་རིང་པོ་ནས་འདིར་འོངས་ལ།  དེང་ཡང་ཐོག་མར་ཁྲིའི་སྟེང་དུ་འཁོད་པ་ཡིན་པས་ན།  བདག་གིས་སྔོན་དུ་བརྗོད་པར་རིགས་སོ་ཞེའོ།  །མུ་སྟེགས་པ་ན་རེ།  དེ་ལྟར་བྱེད་ནའང་རུང་ངོ་།  །ཁྱེད་ཀྱིས་ཇི་ལྟར་བཤད་པ་དེ་དག་ནི་བདག་གིས་དེང་ཉིད་དུ་མ་ལུས་པར་ཚར་གཅོད་པར་བྱའོ་ཞེའོ།  །གནས་བརྟན་རྩིབས་ན་རེ།  གནམ་འོག་ཞི་བདེས་ཁྱབ་པ་དང་།  །རྒྱལ་པོའི་སྐུ་ཚེ་མཆོག་ཏུ་རིང་།  །རྒྱལ་ཁམས་ལོ་ཕྱུགས་ལེགས་གྱུར་ཅིང་།  །རྒུད་པ་ཐམས་ཅད་ཞི་བར་བྱ།  །ཞེས་གསུངས་སོ། 

མུ་སྟེགས་པས་ལན་གང་ཞིག་བརྗོད་དགོས་པ་མ་ཤེས་ནས་ཅི་ཡང་མི་སྨྲ་བར་འདུག་གོ །དེས་རྩོད་པའི་ལན་མ་རྙེད་པས་ན་ཕམ་པའི་གནས་སུ་ལྷུང་ངོ་།  །དེ་ཉིད་དུ་བཏུལ་ནས་སློབ་མར་བཅུག་སྟེ་སྐྲ་དང་ཁ་སྤུ་བྲེགས་ཤིང་།  དགེ་ཚུལ་དང་བསྙེན་པར་རྫོགས་པའི་སྡོམ་པའི་དངོས་པོ་ཡང་སྦྱིན་ནོ། 

དེ་ནས་དེ་ཉིད་གཅིག་པུ་སྡོད་ཅིང་ཡིད་ལ་འདི་ལྟར་ཤར་ཏེ།  བདག་ཡོན་ཏན་ཕུལ་དུ་བྱུང་བ་ནི་ས་ཐག་རིང་པོ་རྣམས་ནས་ཀྱང་ཤེས་པས་སྙན་གྲགས་གནམ་འོག་ཀུན་ཏུ་ཁྱབ་པ་ཞིག་ལགས་ན།  རྒྱུ་མཚན་གང་གིས་ན།  ཚིག་གཅིག་ཁོ་ནས་ཕམ་ཏེ་གཞན་གྱི་སློབ་མར་གྱུར་ཏམ་སྙམ་དུ་ཡིད་ལ་དྲན་པ་ཙམ་གྱིས་ཤིན་ཏུ་མི་དགའ་བར་གྱུར་ཏོ། 

སློབ་དཔོན་གྱིས་དེའི་སེམས་ཤེས་ནས་དེ་མ་ཐག་ཏུ་བཞུགས་གནས་སུ་བོས་ཏེ།  རྫུ་འཕྲུལ་གྱི་རྐང་པ་ལ་བརྟེན་ནས་ཆོ་འཕྲུལ་སྣ་ཚོགས་བསྟན་ཏོ།  །དེའི་རྐྱེན་གྱིས་སློབ་དཔོན་དེ་ཉིད་སྐྱེ་བོ་ཕལ་པ་མིན་པར་ཤེས་ནས་སེམས་དགའ་ཞིང་དུལ་བར་གྱུར་ཏེ།  བདག་འདིའི་སློབ་མར་གྱུར་པ་ནི་འོས་པ་ཉིད་དོ་སྙམ་མོ། 

དེ་ལ་སློབ་དཔོན་གྱིས་སྨྲས་པ། ཁྱེད་ཉིད་ཡོན་ཏན་དེ་ལྟར་བཟང་བ་ནི་སླ་བ་ཞིག་མ་ཡིན་ཡང་།ད་དུང་དམ་པའི་དོན་ཉིད་མ་རྙེད་པས། གལ་ཏེ་བདག་གིས་ཐོབ་པའི་ཆོས་ལ་བསླབ་ན།དབང་པོ་དང་།  སྟོབས་དང་།  བྱང་ཆུབ་ཀྱི་ཡན་ལག་དང་།  འཕགས་ལམ་ཡན་ལག་ཀུན་ལ་སྤོབས་པ་ཟབ་མོ་བརྙེས་ནས། རྒྱལ་བའི་དགོངས་པ་གསལ་བར་རྟོགས་པར་འགྱུར་བས། གནམ་འོག་ཏུ་འགྲན་པའི་ཟླ་དང་བྲལ་བར་འགྱུར་རོ།    

དེ་ནས་སློབ་དཔོན་སླར་རང་གི་རྒྱལ་ཁབ་ཏུ་གཤེགས་ཤིང་།སློབ་མ་ནི་རྒྱ་གར་གྱི་ཡུལ་དབུས་སུ་བཞུགས་སོ། །གཞུང་ལུགས་ཀུན་ལ་ལྷག་པར་མཁས་ཤིང་།  ཕྱི་ནང་ཐམས་ཅད་གསལ་བར་མཁྱེན་པས། སྤོབས་པས་འཇིག་རྟེན་ཀུན་ཏུ་ཁྱབ་ཅིང་།  རིགས་བཞི་ཀུན་གྱིས་གུས་པས་བཏུད་དེ། རྒྱ་གར་གྱི་རྒྱལ་པོས་ཤིན་ཏུ་གཅེས་པས་བསྙེན་བཀུར་རྒྱ་ཆེར་ཞུས་སོ། 

དེའི་རྗེས་སུ་རྒྱ་གར་བྱང་ཕྱོགས་ཀྱི་ཀུ་ཥ་ཎའི་རྒྱལ་པོས་དམག་དྲངས་ཏེ།  ཡུལ་དབུས་ཀྱི་རྒྱལ་པོས་འགོག་སྲུང་ཡུན་རིང་དུ་བྱས་ཅིང་།  རེ་ཞིག་ནས་རྒྱ་གར་ཡུལ་དབུས་ཀྱི་རྒྱལ་པོས་ཕོ་ཉ་བཏང་སྟེ་སྤྲིང་ཡིག་གི་ལམ་ནས་སྨྲས་པ།  གལ་ཏེ་དོན་དུ་གཉེར་བ་འགའ་ཡོད་ན་ཁྱེད་ལ་སྦྱིན་ནའང་རུང་བས། ཅིའི་ཕྱིར་ན་ཡུལ་འདིའི་སྐྱེ་བོ་རྣམས་བཅིང་ཞིང་སྡུག་ལ་སྦྱར་ནས་ཡུན་རིང་དུ་སྡོད་ཅེའོ།  །ལན་དུ་སྨྲས་པ།  གལ་ཏེ་ཁྱོད་འདུད་པར་སེམས་ན།  གསེར་འབུམ་གསུམ་བྱིན་ན་གཏོང་ངོ་ཟེར་བར།  །རྒྱལ་ཁམས་ཀུན་ཏུའང་གསེར་འབུམ་གཅིག་མི་ལང་ན་གསེར་འབུམ་གསུམ་གང་ནས་རྙེད་ཅེའོ། 

ལན་དུ་སྨྲས་པ།  ཁྱོད་ཀྱི་རྒྱལ་ཁབ་ནང་དུ་ནོར་བུ་ཆེན་པོ་གཉིས་མཆིས་ཏེ།  དང་པོ་ནི་བཅོམ་ལྡན་འདས་ཀྱི་ལྷུང་བཟེད་ཡིན་ལ།  གཉིས་པ་ནི་སྤོབས་པ་དང་ལྡན་པའི་དགེ་སློང་ངོ་།  །དེ་གཉིས་བདག་ལ་བྱིན་ན་གསེར་འབུམ་གཉིས་དེས་མཐུས་སོ་ཟེར་བར།  །རྒྱལ་པོས་ལན་དུ་སྨྲས་པ།  ནོར་བུ་དེ་གཉིས་བདག་ཤིན་ཏུ་གཅེས་པས་སྦྱིན་མི་ཕོད་དོ་ཞེའོ།

དེ་ནས་དགེ་སློང་གིས་རྒྱལ་པོ་ལ་ཆོས་བསྟན་ཏེ་ཚིག་འདི་ལྟར་སྨྲས་ཏེ། 

དམ་པའི་ཆོས་ཀྱིས་འདུལ་བ་མི་འོས་པའི།  །སེམས་ཅན་དེ་ནི་གང་ནའང་ཡོད་མིན་ཅིང་། 

རྒྱལ་བའི་ལམ་ནི་ཟབ་ཅིང་རྒྱ་ཆེ་བས། །འགྲོ་བ་ཐམས་ཅད་སྐྱབས་པའི་དོན་ལ་དགོངས། །

སྐྱེས་བུ་ཆེན་པོ་དག་གི་ཡོན་ཏན་ལ།  །གཞན་དག་ཕན་བདེར་འདྲེན་ཉིད་ཁྱད་པར་འཕགས། 

འཇིག་རྟེན་ཆོས་ནི་མང་མོད་ངལ་དང་བཅས། །རྒྱལ་པོས་རྒྱལ་ཁབ་གཅིག་ཙམ་འདུལ་ནུས་ཤིང་། །དེང་འདིར་སངས་རྒྱས་ལམ་བཟང་ཆེར་སྤེལ་བས།  །རང་ཉིད་ཕྱོགས་བཞིའི་ཆོས་ཀྱི་རྒྱལ་པོར་འགྱུར།  །དགེ་སློང་དག་གིས་འགྲོ་བ་སྒྲོལ་བ་ནི།  །བཟློག་ཏུ་མེད་པའི་དོན་ཉིད་ལགས་མོད་ཅིང་།  །ཡོན་ཏན་སེམས་ལ་གནས་པ་ཉིད་ཀྱི་ཕྱིར།  །ས་ཐག་ཉེ་རིང་ཁྱད་པར་ཡོད་མ་ཡིན།  །དེས་ན་རིང་མོའི་དོན་ཆེན་དགོངས་རིགས་པས།  །མིག་སྔར་དོན་ཙམ་གཟིགས་པ་ག་ལ་འོས།  །ཞེས་གསུངས་སོ།   

རྒྱལ་པོས་ནི་རྒྱུན་དུ་ཁོང་ལ་གཅེས་ཤིང་གུས་ལ་བཀའ་བཞིན་སྒྲུབ་པས་ཁོང་ཉིད་བྱིན་ནོ།  །དེ་ནས་ཀུ་ཥ་ཎའི་རྒྱལ་པོ་ཕྱིར་རང་གི་རྒྱལ་ཁབ་ཏུ་ལོག་གོ།དེའི་བློན་པོ་རྣམས་ན་རེ།  རྒྱལ་པོས་སངས་རྒྱས་ཀྱི་ལྷུང་བཟེད་ལ་གུས་པ་ནི་འོས་ཤིང་འཚམས་པ་ལགས་མོད།  དགེ་སློང་ནི་གནམ་འོག་གང་དུའང་ཡོད་པས་གསེར་འབུམ་ལ་རྩིས་པ་ནི་ཆེས་ཐལ་བར་མ་ལགས་སམ་ཞེས་གླེང་ངོ་། 

རྒྱལ་པོས་ནི་དགེ་སློང་དེ་ཉིད་རྟོགས་པ་མཐོ་ཞིང་གསལ་བ།  མཁྱེན་རབ་ཁྱད་པར་དུ་འཕགས་པ། འདྲེན་ཅིང་སྟོན་པའི་ཐབས་ལ་ཤིན་ཏུ་མཁས་པ། ཆོས་གསུངས་པའི་སྤོབས་པས་མི་མིན་རྣམས་ཀྱང་འདུལ་བར་ནུས་པ་སོགས་ཞིབ་པར་མཁྱེན་ཡང་།  རྨོངས་པའི་འགྲོ་བ་རྣམས་ཀྱིས་རྟོགས་པ་བྱེད་པར་འདོད་ནས། རྟ་ཞིག་ཉིན་དྲུག་གི་བར་དུ་ལྟོགས་པར་བཞག་གོ། 

ཉིན་དྲུག་པའི་ཞོགས་པར་ནང་པའི་དགེ་སྦྱོང་དང་།  ཕྱི་རོལ་པ་ཐམས་ཅད་འཚོགས་ནས་དགེ་སློང་ལ་ཆོས་གསུངས་པར་སྐུལ་བས།  ཉན་པ་པོ་ཐམས་ཅད་ཉམས་རྟོགས་ཀྱི་སྒོ་མ་ཕྱེ་བ་གཅིག་ཀྱང་མེད་དོ།  །རྒྱལ་པོས་རྟ་དེ་སྐྱེ་བོའི་ཚོགས་ཀྱི་དབུས་སུ་བཏགས་ནས་རྩྭ་བྱིན་པས།རྟ་དེས་མིག་ཆུ་གཏོང་བཞིན་ཆོས་ཉན་པ་ལས་ཟས་ལ་མི་སེམས་སོ།     

དེའི་རྐྱེན་གྱིས་གནམ་འོག་ཀུན་ཏུ་དེ་ཉིད་ཐ་མལ་པ་ཞིག་མིན་པར་ཤེས་སོ།  །རྟས་ཀྱང་དེའི་སྐད་གོ་བས་ན་བྱང་ཆུབ་སེམས་དཔའ་རྟ་དབྱངས་ཞེས་བྱའོ།  །རྒྱ་གར་བྱང་ཕྱོགས་སུ་སངས་རྒྱས་ཀྱི་ཆོས་རྒྱ་ཆེར་གསུངས་ཤིང་།  ཐབས་ལ་མཁས་པས་འགྲོ་རྣམས་འདྲེན་པའི་ཐབས་ལ་མཁས་པས།  སྐྱེ་འགྲོ་རྣམས་ཀྱི་ཡོན་ཏན་འགྲུབ་པར་བྱེད་པས།  རིགས་བཞིས་གུས་ཤིང་འདུད་པས་ན།  ཡོན་ཏན་ཉི་མ་ཞེས་ཀྱང་འདོགས་སོ།     

སློབ་དཔོན་རྟ་དབྱངས་ཀྱི་རྣམ་ཐར་རྫོགས་སོ༎༎ 

 

 

 


དཔྱད་བརྗོད་གསར་པ།དཔྱད་བརྗོད་ཀྱི་གྲངས་ཀ0
དཔྱད་པ་བརྗོད་པ།
དཔྱད་བརྗོད་ཀྱི་ནང་དོན།:ཡིག་འབྲུ་ལྔ་བརྒྱ་ལས་འདས་མི་ཆོག
རུས་མིང་།: གསང་རྟགས:
གསང་མིང་།
ཐོ་བཀོད།